لو مكنتش مصري.. كنت احب اكون صيني

بالظبط زى ما قريت كده لو مكنتش مصري.. كنت احب اكون صيني


لالالا مش علشان احجامهم صغيره.. وتنفع فى زحمه مصر ولا عشان كلهم شبه بعض وده فى بلدنا عز الطلب.. اسرق واعمل ابن عمك اقتل وقول انك خالتك .. مش عشان شعب مؤدب وتحسهم ذوق والكلمه ديه بره قاموس المصرين .. ولا عشان لوحد منهم داس على رجلك فى المترو هيقعد يتأسفلك ساعه كأنه أجرم جريمه حرب مع ان لو مصرى كان مسكك رزعك قلم وبهدلك ......

محدش منكم لاحظ ان الصينين فى بلدنا قربوا يبقوا اد ولاد البلد ؟

طيب محدش حس ان الصين غزت مصر ؟ طيب حد فكر هما ليه اختاروا مصر تحديدا عشان يسوقوا فيها منتجاتهم ؟



اهو دا اللى هنتكلم فيه





السوق المصرى ( واخدين بالكم المصرى ) بقى كله صينى كان من كام سنه بدأ بفوانيس رمضان والبطاريات الحجاره ( اللى بتخلص اول ما تركبها ) بعدها انتشر فى لعب الاطفال

( اى نعم كان بلستكها وحش ) بس كانت افكارها مبتكره ولاد العفاريت تحسوا ولدهم بيلعبوا لعب فيها تنميه مهارات واحنا ولدنا ( ملحوسين فى الطين او بيلعبوا بالنحله) ولو ربك كرم العيل منهم بشويه ذكاء هتلاقيه بيلعب ( بالميكانوا) وهيفضل يركب فى الشكل الصح طفولته ومراهقته وشبابه

وولاده يكمله المسيره نظرا لتأخر عقليات الاطفال وتدنى ذكائهم.. نتيجه لعدم الاهتمام









بعدها ظهر الصينى فى الاجهزه.. كانت الاول تليفزيونات ومحدش كان بيشتريها لا دلوقتى بقى كل الاجهزه تقريبا بقت صينى حتى الموبايلات وللامانه الجوده بتاعتها مش بطاله يمكن مش هتعيش كتير بس اهو بتاخد وقتها وتبوظ

والفتره الاخيره لاقينا كل المنتجات المعروضه فى السوق من اجهزه ولبس واكسسوارات عربيات وموبايلات ومكياجات صينى وحاجات مش نتخيل انها صينى انا والله بلاقى أبر مكتوب عليها بلد المنشأ الصين يعنى حتى الابره مش سابوها

ده غير طبعا الظاهره الغريبه اللى انتشرت وهيا انك تبقى قاعد فى بتكم فى امانه الله وتلاقى واحده بتخبط عليك ومعاها منتجات صينيه تخص جهاز العرايس بس للامانه بيخبطوا مره واحده وبيعرضوا مره واحده عايز ؟ لا طب شكرا .. مش البياعين بتوعنا يهدوا عليك باب الشقه واباً جزماً تشترى ولو مش اشتريت الواحد منهم عنده القدره يفضل واقف لحد ما تكره عيشتك وتشترى ان شالله ترميها بعد ما ينزل المهم عنده تشترى



**حسيت ان الموضوع ده زاد عن الحد .. البلد نصها ناس صينيه بتبيع والنص التانى المنتجات نفسها واحنا شعب وحكومه بنقلب فى البضاعة وبنشترى لا وبنفاصل





قعدت اسأل نفسى طب ليه ده حاصل ليه هما شايفين بلدنا وشعبنا مستثمر كويس وليه احنا شعب وحكومه فرحانين بده جدا





(( من نظره الصين ))








1 - الصين متحمسه لشتغيل شبابها بدل بطالتهم وبدل ما يمثلوا عليها عبىء وبتبعت برده اللي في السجون يقضي السجن في مصر

2 - تسويق منتجات زياده عن حاجه بلدهم او فرز تانى

3 - شايفين فينا طبع التضحيه.. بنقتنع بنصف الجوده على حساب سعر اقل

4 - ملاحظين حبنا وولعنا بشراء كل حاجه واى حاجه حتى لو ملهاش لزمه او عندنا منها بدل الوحده 3

5 - شايفين شعب هيفرح بالمنتج باى شكل ومش هيسأل طب ليه احنا بالذات ومش غيرنا من العرب او الغرب





(( من نظره المصرين ))





1- الحكومه بتقول وماله اهو المنتجات الصينى هتلهى الشعب عن متج بلده وبالتالى نصدره بره بسعر اعلى

2 - الحكومه فرحانه اننا بنتلهى برضه فى الصينى وبطلنا نزن فى ودنهم عن تدنى جوده المنتج المصرى او زياده سعره على الفاضى او شكله اللى يقرف

3 - فرصه الشعب الغلبان الهفتان ان المنتج جايله لحد بلده شكلا كويس جوده معقوله وسعر من الاخر لقطه .. لا وايه مافيش فصال زى البياعين المصرين ما شطار فى سرقه الزباين




** لحد هنا وماشى انما ليه المنتج المصرى مش واخد فرصته فى مصر لاهل بلده وامتى هيطلع ويقول انا هنا ولا احنا عاجبنا الشعوب اللى طلعت بعدنا تسبقنا حتى فى ابسط المنتجات زى الابر.